Chanson du nez d'argent, sur le chant de la fille portant panier

Chanson du nez d'argent, sur le chant de la fille portant panier

Crouzet, Guerriers de Dieu: Le 2 mai 1562, Pierre Créon (ou Craon), dit Nez d'argent, est exécuté aux Halles, à Paris, en compagnie d'un écolier. Face au cadavre du pendu, les petits enfants prennent la suite du bourreau, 'tiraient infinies pierres et boue audit Nez d'argent estant pendu, et s'il eùt eu cent vies apprs sa mort, toutes luy eussent este ostees tant estoit le populas animé contre luy à cause de la religion.'

le chant de la file portent panier

Voulez vous ouyr chanson
La plus belle de France,
C'est du nez d'argent
Qui est mort sans doutance:
A la voyrie fut son corps estendu
Or est le nez d'argent pendu.
On a veu nez d'argent
Avecques ses complices
Estans dedans Paris
Soustenans l'evangile
Des huguenots qui l'ont mal entendu,
Or est le nez d'argent pendu.
Aux fauxbourgs sainct Marceau
En une belle Eglise
Qu'on nomme sainct Medard
Il monstra sa folie:
Car toutes les images a rompu
Mais il en a esté pendu.
Tous les beaux ornement
Qui estoient en l'Eglise,
Ce meschant nez d'argent
En a faict a sa guise,
Mieux eust vallu pour luy qu'il l'eust rendu,
Car il en a esté pendu.
Sa fille a mariée
En huguenoterie,
Mais les gens vont disant,
C'est du bien de l'Eglise,
Mieux eust vallu pour luy qu'il l'eust rendu,
Car il en a esté pendu.
Aux halles de Paris
On en fit la justice,
Puis les petits enfans
En feirent le service,
Bien tost en bas l'on descendu
Apres qu'il eut esté pendu.
Quand ils l'eurent jetté
Du haut de la potence,
Tous ces petits enfans
Se sont remis ensemble,
A la voirie l'ont trainé,
L'avoit il pas bien merité?
Ils ont prins leur chemin
Par la ferronnerie,
Lié et garrotté
Menans joyeuse vie,
Crians, chantans joyeusement
Voicy venir le nez d'argent.
Quand ils l'eurent trainé
Dedans son cymetiere,
Par dedans le ruisseau
Qui luy servoit de biere,
Lors ses tripailles vont tirer
Pour dedans un feu les jetter
Quand ils l'eurent trainé
Ou estoit son sepulchre,
Bien tost luy ont osté
Les tripes & la fressure,
Puis de son coeur un chien l'a avallé,
Voila allé, voila allé.
Puis de son compagnon
Ne voulons nous rien dire,
Il a tousjours esté
Huguenot pour la vie,
Qu'en fut il faict, il a esté bruslé,
Comme il avoit bien merité.
Le lendemain matin
Qui estoit le Dimanche,
Quatre petits garçons
Se sont remis ensemble,
Qui la moitié de son corps ont trainé
A la voyrie avec le nez.
Qui fit ceste chanson
Voulez que je le die,
Un gentil compagnon
Enfant de ceste ville,
Qui veit le nez d'argent trainé
Par la rue sainct Honoré.

hanging

heresy

Les Halles, Paris

Le Recueil des chansons des batailles & guerres advenues au Royaume de France, durant les troubles. Par Christofle de Bordeaux, & autres. Augmentées de plusieurs chansons nouvelles. (Paris: Nicolas Bonfons, rue neuve nostre Dame, à l'enseigne sainct Nicolas, 1575)

involved in the riot of Saint-Medard, December 1561